3-4 верасня 2022 года горад Добруш Гомельскай вобласці стаў месцам правядзення ХХІХ Дня беларускага пісьменства. Гэтыя два святочныя дні былі напоўнены цікавымі падзеямі, якія праходзілі на 20 пляцоўках горада.

    У шэрагу запамінальных мерапрыемстваў яркай падзеяй стаў канцэрт з удзелам фіналістаў Рэспубліканскага конкурсу юных чытальнікаў "Жывая класіка", у якім прынялі ўдзел 15 пераможцаў і прызёраў конкурсу. Усе юныя артысты былі прасякнуты асаблівай атмасферай кахання і павагі да самабытнага беларускага слова, якой была напоўнена глядзельная зала, і таму з асаблівым трапятаннем выходзілі на сцэну, каб прачытаць свае любімыя радкі беларускіх аўтараў, у ліку якіх былі і юбіляры гэтага года – народныя паэты Беларусі Янка Купала і Якуб Колас. Разам з імі радасць дзіцячай творчасці ўсім гледачам дарылі творчыя калектывы Гомельшчыны і ўзорны ансамбль танца "Натхненне" Нацыянальнага цэнтра мастацкай творчасці дзяцей і моладзі. У гэты дзень для ўсіх фіналістаў "Жывой класікі" адбылася яшчэ адна важная падзея - Міністр адукацыі Рэспублікі Беларусь Андрэй Іванавіч Іванец уручыў ім дыпломы пераможцаў і прызёраў конкурсу, сертыфікаты на адну з творчых змен у Нацыянальны дзіцячы адукацыйна-аздараўленчы цэнтр "Зубраня" і Мінскі аквапарк, і вядома ж кнігі беларускіх класікаў і сучасных аўтараў, якія, магчыма, натхняць іх на новыя творчыя здзяйсненні.

    У гэты ж дзень, 3 верасня таленавітыя маладыя чытальнікі, якія сталі пераможцамі конкурсу, прынялі ўдзел ва ўрачыстай цырымоніі адкрыцця Дня беларускага пісьменства, якое прайшло на цэнтральнай плошчы г. Добруша.