26 жніўня ў горадзе Мінску адбыўся фінал Рэспубліканскага творчага конкурсу “Жывая класіка”, дзе было прадстаўлена 17 творчых нумароў ад навучэнцаў устаноў агульнай сярэдняй і дадатковай адукацыі дзяцей і моладзі нашай краіны.

   Конкурсныя выступленні праходзілі адначасова з запісам тэлевізійнай праграмы ў прафесійным здымачным павільёне тэлеканала СТВ (“Сталічнае тэлебачанне”), дзе звычайна ствараюцца тэлевізійныя шэдэўры.

     Ацэньвала выступленні фіналістаў конкурсу рэспубліканскае журы ў склад якога ўвайшлі:

• Уладзімір Андрыевіч – начальнік упраўлення выдавецкай і паліграфічнай дзейнасці Міністэрства інфармацыі Рэспублікі Беларусь, заслужаны дзеяч культуры Беларусі;
• Аляксандр Карлюкевіч – старшыня грамадскага аб’яднання “Саюз пісьменнікаў Беларусі”, дырэктар выдавецтва “Беларусь”;
• Надзея Коршунава – мастацкі кіраўнік установы адукацыі “Нацыянальны цэнтр мастацкай творчасці дзяцей і моладзі” Міністэрства адукацыі Рэспублікі Беларусь;
• Наталля Надольская – дырэктар дырэкцыі спецыяльных праектаў тэлеканала “Сталічнае тэлебачанне”;
• Алесь Бадак – пісьменнік, дырэктар выдавецтва “Мастацкая літаратура”;
• Наталля Рачкоўская – актрыса, рэжысер, кіраўнік Узорнага тэатра юнацкай творчасці “ТЮТ”.

    Атмасфера на пляцоўцы была напоўнена асаблівым, трапяткім хваляваннем. Юныя ўдзельнікі не проста чыталі тэкст – яны пражывалі кожнае слова, напаўняючы класічныя творы сваім разуменнем і эмоцыямі.

   Членам журы прыйшлося вырашаць складаную задачу – ацэньваць выступленні, кожнае з якіх было напоўнена асабістай глыбінёй і эмацыйнасцю. Усе ўдзельнікі паказалі высокі ўзровень падрыхтоўкі і сапраўдную любоў да беларускай літаратуры.

    Цырымонія ўзнагароджання пераможцаў і прызёраў i гала-канцэрт Рэспубліканскага конкурсу юных чытальнікаў “Жывая класіка 2025”, які пройдзе ўпершыню на галоўнай фестывальнай пляцоўцы Дня беларускага пісьменства, адбудуцца ў г. Ліда Гродзенскай вобласці.

     7 верасня 2025 года Тэлеканал СТВ пакажа праграму, у якую ўвойдуць візітоўкі ўдзельнікаў конкурсу і іх конкурсныя выступленні.

ВЫНІКІ Рэспубліканскага конкурсу юных чытальнікаў “Жывая класіка 2025”

“Жывая класіка” – гэта свята слова і таленту.